ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាដល់មេបញ្ជាការកងអង្គរក្ស នាយឧត្តមសេនីយ៍ ហ៊ីង ប៊ុនហៀង ឲ្យបណ្ដេញលោកសាន្តប៊ុនធឿនចេញពីក្របខណ្ឌកងទ័ព។ ការបណ្ដេញចេញនេះគឺដោយសារតែឈ្មោះ សាន ប៊ុនធឿន នេះនៅតែមានចរិកផឹកស៊ីជេរបញ្ចោរតាមបណ្ដាញសង្គមបើទោះបីជាសម្ដេចធ្លាប់ណែនាំក៏ដោយ។
សម្ដេចតេជោបានសរសេរយ៉ាងដូច្នេះថា៖ «ចរិតពាលរបស់ សាន ប៊ុនធឿន ប្រាកដជាមិនអាចកែប្រែបានឡើយ។ ដើម្បីជួយដល់ សាន ប៊ុនធឿន និងប្រពន្ធកូន ខ្ញុំនិងភរិយាបានជួយលុយដើម្បី សាន ប៊ុនធឿន ទិញផ្ទះនៅ ថែមទាំងផ្តល់លុយជូន សាន ប៊ុនធឿន ៥០០ដុល្លារក្នុងមួយខែ តាំងពីឆ្នាំ២០១៨មក។ ខ្ញុំធ្លាប់បានអប់រំ សាន ប៊ុនធឿន កុំឱ្យសុីផឹកជេរបញ្ចោរតែចរិតមនុស្សនេះកែមិនឡើងឡើយ។ ដើម្បីជៀសវាងនូវការយល់ច្រឡំណាមួយកើតឡើងថ្ងៃនេះខ្ញុំបានបញ្ជារឱ្យមេបញ្ជាការអង្គរក្សស្នើរសុំបណ្តេញ សាន ប៊ុនធឿន ចេញពីក្របខណ័្ឌកងទ័ព»។
គួរឲ្យដឹងថាកាលពីឆ្នាំ២០១៨ រដ្ឋមន្ត្រីក្រសួងការពារជាតិ សម្ដេចពិជ័យសេនា ទៀ បាញ់ បានបញ្ចូលក្របខ័ណ្ឌ និងប្រគល់ឋានន្តរស័ក្តិ ថ្នាក់វរសេនីយ៍ត្រី នាយទាហាន នៃកងយោធពលខេមរភូមិន្ទដល់លោក សាន្ត ប៊ុនធឿន អត្តលេខ១៧០២៤៨ ដែលកាន់តួនាទីជាជំនួយការ បញ្ជាការដ្ឋានអង្គរក្ស អគ្គបញ្ជាការដ្ឋាន៕
